Прохоров Казанда үзенең сайлау алды программасын тәкъдим итте - 26 Января 2012

Россия Президенты вазифасына үз кандидатурасын күрсәткән эшкуар Михаил Прохоров Казанда үзенең сайлау алды программасын тәкъдим итте. Ул "Корстон”да Татарстан яшьләре белән очрашу үткәрде.
Яшьләр алдында ясаган чыгышында ул 10 иң мөһим адым - үзен хуплаган һәм Россия Президенты булган очракта нәрсә эшләячәге хакында сөйләде. Мисал өчен, Михаил Прохоров фикеренчә, сәяси реформа үткәрү ихтыяҗы килеп туган. "Хакимият халыкка эшләргә тиеш”, - дип ассызыклады ул. Президентлыкка кандидат партияләр турындагы законны либеральләштерергә, сайлаулардагы салымны киметергә, сайлау алды блоклары оештыруны рөхсәт итәргә, бюллетеньнәргә "барысына да каршы” дигән графаны кире кайтарырга тәкъдим итә. Эшкуар шулай ук Президент һәм губернаторларны сайлау мөмкинлеген "үз гомерендә ике срок белән генә” чикләүне таләп итә.
Эшкуар Михаил Прохоров үзен РФ Президенты итеп сайлаган очракта "Газпром”ның өстенлекләрен гамәлдән чыгарырга һәм аны көндәшлек итүче компанияләргә бүләргә вәгъдә итте. Эшкуар фикеренчә, Россиядәге күпчелек проблемаларның сәбәбе сәяси һәм икътисади өлкәдә көндәшлек булмауга барып тоташа. Җиңгән очракта ул активларының зур өлешен хәйрия максатларына юнәлдерергә вәгъдә бирде.
"ОНЭКСИМ” башлыгы федераль округларны бетерергә тәкъдим итә. Михаил Прохоров шулай ук 2015 елга армияне формалаштыруны төгәлләргә һәм мәҗбүри чакырылышны гамәлдән чыгарырга ниятли. "Мин сөйләгәннәремнең барысына да ышанам. Мин моны сезнең белән бергә эшләргә әзер”. Ул үзенең сайлау алды программасын әнә шундый сүзләр белән тәмамлады һәм очрашуда катнашучыларның күпсанлы сорауларына җавап бирде.
"Мин икенче турга узу өчен барысын да эшләячәкмен”, - диде Михаил Прохоров һәм икенче турга башка кандидатлар узган очракта "үз тарафдарларымны кем өчендер тавыш бирергә үгетләмәячәкмен, кемгә тавыш бирергә икәнлеген алар үзләре хәл итәчәк”, дип өстәде.
Эшкуар алда торган сайлауларда татарстанлыларның ничә процент тавышына исәп тота алуын белмәсә дә, "үз карашларын һәркемгә җиткерергә тырышачак”.